Прилепскиот состав Connect Band одбележува пет години постоење на најубав можен начин – со својата прва авторска песна и официјален видеоспот, насловена „Води ме со тебе“.
Песната, објавена на 6 август, носи ведра, летна и романтична енергија, со текст кој зборува за љубовта, привлечноста и желбата едноставно да се тргне некаде со саканата личност. Ритмичниот рефрен „Води ме со тебе“ ја носи целата атмосфера на песната – лесна, разиграна и создадена за летните денови.
Со „Води ме со тебе“, Connect Band прави значаен чекор напред, преминувајќи од изведувачки во авторски бенд, а изборот токму петгодишнината да биде повод за нивното прво авторско дело му дава дополнително значење на проектот.
Музиката е на Петар Цветаноски, текстот го потпишува Весна Малинова, додека аранжманот е дело на Петар Цветаноски и Јордан Манов. Песната е снимена и миксана во Devil’s Eye Studio.
За визуелната приказна е задолжен тимот на Epik Visuals. Сценариото и режијата се на Љупчо Атанасоски, кој го потпишува и продукцискиот дел, додека како втор камерман е ангажиран Димитар Долгоски. Во спотот учествуваат и моделите од Max Models – Ангелина Наумовска и Виктор Ивановски.
Токму оваа едноставност и позитивна енергија ја прават песната лесна за слушање и препознатлива уште од првото слушање.
Од Connect Band велат дека песната за нив има посебно значење, бидејќи доаѓа во моментот кога го одбележуваат петтиот роденден на бендот. Во својата порака до публиката тие упатуваат благодарност за довербата, поддршката и љубовта што ја добивале во изминатите пет години, истакнувајќи дека токму поддршката од публиката им дава мотив да растат, создаваат и продолжат со нови проекти.
Песната и официјалниот видеоспот се достапни на нивниот официјален YouTube канал, а за само неколку дена „Води ме со тебе“ веќе привлече значително внимание од публиката.
На Connect Band им посакуваме уште многу успешни години, нови авторски песни и проекти, а „Води ме со тебе“ да биде само почеток на една уште поголема авторска приказна.
