Метакритик, веб-локација која собира прегледи на филмови, ТВ-емисии, музика, книги и видео игри, ја објави конечната листа на 50-те највисоко оценети филмови во 2022 година.
Нивната листа вклучува само филмови кои добиле најмалку седум критики од професионални критичари.
„Aftersun„, драма од 2022 година, напишана и режирана од Шарлот Велс, со Пол Мескал, Френки Корио и Селија Роулсон-Хол во главните улоги, се најде на врвот на листата.
„Според критичарите, тоа е реткиот филм што ви останува во мислите долго по последниот кадар“, според Метакритик.
Имено, станува збор за трогателна приказна за сложената врска меѓу таткото и ќерката и нивниот последен заеднички одмор. Заплетот на филмот го следи емотивното и носталгично патување на една девојка, Софи, која се присетува на летниот одмор со нејзиниот татко кога имала 11 години. Триесетгодишниот татко Калум минува низ тежок период, се занимава со растењето и важните години на својата ќерка со која не се гледа често.
Инаку, „Aftersun“ е еден од овогодинешните фаворити за номинација за Оскар.
