На глобалните пазари на нафта, цените на барелот пораснаа и минатата недела, седми пат по ред, постигнувајќи го најдолгиот тренд на раст од почетокот на 2022 година, откако Меѓународната агенција за енергетика предупреди на сè потесна понуда.
На лондонскиот пазар цената на барелот брент минатата недела порасна за 0,5 отсто, на 86,81 долар, а за толку порасна и цената на барелот на американскиот пазар, завршувајќи ја неделата на 83,19 долари.
Цената на Брент сировата нафта е на највисоко ниво од јануари, а американскиот WTI од почетокот на годината. Последен пат цената на нафтата порасна седум последователни недели во периодот јануари-февруари 2022 година, во пресрет на руската инвазија на Украина.
Растот на цената на нафтата беше поддржан од проценката на IEA објавена во петокот дека глобалната побарувачка на нафта достигна рекордни 103 милиони барели дневно во јуни и може да достигне ново рекордно ниво во август.
ОПЕК, сепак, во својата месечна прогноза, ги повтори своите проценки за годишната побарувачка на нафта, очекувајќи раст од 2,25 милиони барели дневно во 2024 година, во споредба со 2,44 милиони барели дневно во 2023 година.
На страната на понудата, производството значително забави во последните месеци, поради доброволните намалувања на производството во Саудиска Арабија и Русија. Организацијата на земјите извознички на нафта (ОПЕК) и нејзините сојузници, колективно познати како ОПЕК +, почнаа да ја намалуваат понудата кон крајот на 2022 година за да го зајакнат пазарот, а во јуни ги продолжија намалувањата до 2024 година.
Доколку се задржат тековните цели на ОПЕК +, залихите на нафта би можеле да паднат за 2,2 милиони барели дневно во третиот квартал и за 1,2 милиони барели дневно во четвртиот квартал, што потенцијално ќе поттикне ново зголемување на цената, предвиде IEA во петокот.
И изгледите за благо закрепнување на американската економија, како и шпекулациите дека ФЕД се приближува кон крајот на циклусот на зголемување на каматните стапки, го поддржа доброто расположение на трговците со нафта.
„Намалувањето на понудата и подобрените економски изгледи создадоа оптимизам кај нафтените инвеститори“, истакнува аналитичарот на OANDA, Крег Ерлам.
