Доколку не ги сакате вештачките бои и барате природен начин како за велигденската трпеза да добиете уникатна боја за фарбање јајца, многу од работите што веќе ги имате во вашата кујна можат да ви помогнат во тоа.
Познато е дека јајцата можете да ги исфарбате со лушпи од кромид, со цвекло, морков, а она што можеби не го знаевте е ека можете тоа да го наравите и со зелка. За сина боја ви треба само зелка, сода бкарбона и малку оцет. Со помош на овие намирници ќе добиете две нијанси на сина – кралска и пастелна, без траги од хемикалии и вештачки бои, а еве како:
Една мала црвена зелка исечкајте ја на поголеми парчиња, ставете ја во длабоко тенџере, прелијте со 500 мл вода и варете 35-40 минути на тивок оган. Јајцата сварете ги посебно со малку сол.
Сварената зелка оставете ја целосно да се излади.
Процедете ја водата од зелката, а потоа поделете ја на два сада. Во еден сад додадете четири лажици оцет, а во друг една лажица сода бикарбона. Во едниот сад ќе имате виолетова течност, а темно сина течност во другиот. Виолетовата боја дава прекрасна кралска сина нијанса, а сината пастелна нијанса.
Со една зелка може да се обојат до 30 јајца. Најдобро е да користите бели јајца, бидејќи бојата подобро излегува.
Потопете ги јајцата во бојата да бидат целосно покриени со течност (или преливајте ги со лажица и повремено превртувајте). Можете да ги оставите да отстојат околу половина час – колку подолго стојат јајцата во боја, толку поинтензивна ќе биде нијансата.
Важно е јајцата да се исушат природно на хартија или крпа откако ќе ги извадите од бојата. Не ги бришете бидејќи можете да отстраните дел од бојата додека е уште влажна. Заменете ја влажната крпа со сува додека јајцата целосно не се исушат.
