Маја Андоновска – Илијевски, директорка на Центарот за култура кој е организатор на овој фестивал и Министерката за култура, Бисера Костадиновска – Стојчевска чиј ресор е најголем поддржувач на овој настан, со елоквентни говори ја поздравија публиката и го акцентираа фестивалскиот дух на културно единство и различност.
По церемонијата на отворањето следуваше концертот, на триото TALES FROM THE BOX. Маестрото на хармоника Танос Ставридис, пијанистот Бобан Мирковски и виолончелистката Стела Темпелис ја воодушевија публиката со музичкото патување кое ги надмина времето и границите. Репертоарот на триото се движи од класичната елеганција на Бах и Моцарт до романтичната привлечност на Шопен, живописните ритми на Хачатуријан и композициите на Гершвин со американските примеси на џез.
Концертот беше повеќе од класично искуство. Публиката беше воодушевена од иновативните интерпретации на модерната класика на триото од Квин, Битлси и Пјацола, заедно со волшебните теми на филмската музика од 20 век. Но и ритмови од Балканот.
Овогодинешниот фестивал, прославувајќи ја својата 15-годишнина, ја потврди својата посветеност на прикажување на различни музички традиции. Триото TALES FROM THE BOX, во своето фестивалско деби, го покажа овој етос, спојувајќи ги виолончелото, пијаното и хармониката во беспрекорен спој на минатото и сегашноста, традицијата и иновациите. Нивниот настап не беше само концерт, туку беше хармонична прослава на глобалната музика, која сосем одговара со слоганот на овогодинешното издание.
фотограф | Диоген Хаџи Коста Милевски
