Со цел уметноста и архитектурата да им се доближат на слепите и лицата со оштетен вид во Заводот и музеј Битола од постојаната музејска поставка се претставени првите тактилни слики изработени од месинг во Македонија.
–Изложбата е направена во соработка со двајца уметници- кујунџии од Скопје. Новина е што на секој од месинганите експонати е инсталиран НФЦ таг кој паметниот телефон лесно го препознава и води до аудио нарација и видео на знаковен јазик. Месингот е избран за да се долови металот од кој некои артефакти се изработени. Уметничките слики кои не можат да се направат како копија со платно и со четка, се обидовме да ги направиме со месинг, изјави Ирена Ружин, иницијатор на проектите за пристапност во Завод и музеј- Битола.
Инаку оваа мултисензорна изложба е со цел да биде достапна за посетители со различни попречености.
–Постојаната музејска збирка брои преку 2.000 предмети, а од нив имаме изработено видеа на заковен јазик за лица со проблеми со слух и говор и стотина тактилни слики за оние со оштетен вид. Се надевеме дека во иднина ќе имаме и посебна секција каде слепите лица ќе можат самостојно да го доживеат нашиот музеј, изјави Јове Парговски , еден од изработувачите на сликите и стручен соработник за документација во Завод и музеј Битола.