Членови на ЛГБТК+ заедницата слават пред грчкиот парламент, откако Парламентот гласаше за предлог-законот кој дозволува истополови граѓански бракови. Атина, Грција, 15 февруари 2024 година.
Грција стана првата мнозинска православна христијанска земја која ги легализираше истополовите бракови, според граѓанското право.
Грчкиот парламент во четвртокот (15-ти февруари) го одобри законот со кој истополовите двојки имаат право да се венчаат и да посвојуваат деца. Тоа што доаѓа по децениската кампања на ЛГБТ заедницата за брачна еднаквост во социјално конзервативната земја.
„Ова е историски момент“, изјави за Ројтерс Стела Белија, лидер на здружението на истополови родители „Виножито Фамилии“. „Ова е ден на радост“, додава таа.
Законот е одобрен од 176 пратеници од 300-члениот парламент и ќе стане официјално валиден кога ќе биде објавен во владиниот службен весник.
Иако членовите на централно-десничарската партија Нова демократија на премиерот Кирјакос Мицотакис беа воздржани или гласаа против законот, тој доби доволно поддршка од левичарската опозиција во редок приказ на меѓупартиско единство и покрај напнатата дебата.
„Тоа е многу важен чекор за човековите права, многу важен чекор за еднаквост и многу важен чекор за грчкото општество“, рече Никос Николаидис, четириесетгодишен историчар кој се приклучи на митингот за поддршка на законот пред гласањето.
Последните анкети покажуваат дека Грците се поделени по ова прашање. Моќната православна црква, која верува дека хомосексуалноста е грев, силно се противи на истополовите бракови, додека многумина во ЛГБТ заедницата веруваат дека законот не води доволно далеку.
Тоа не ги отстранува пречките за ЛГБТ паровите да користат методи за асистирана репродукција. Сурогат мајчинството, исто така, нема да се прошири на ЛГБТ лицата, иако законот ги признава децата веќе родени со овој метод во странство.
